صباح الخير على الورد اللى فتح فى جناين مصر
صباح الخير علي الورد اللي فتح في جناين مصر
صباح العندليب يشدي بألحان السبوع يا مصر
صباح الدايه واللفه..... ورش الملح في الزفه
صباح يطلع بأعلامنا من القلعه لباب النصر
سلامتك يامه يا مهره يا حباله
يا ولاده
يا ست الكل يا طاهره
سلامتك من آلام الحيض
من الحرمان
من القهره
سلامة نهدك المرضع
سلامة بطنك الخضرا
هناكي وفرحة الوالدة
تضمي الولد يا والده
يصونهم لك ويحميهم
يكترهم...... يخليهم
يجمع شملهم بيكي
يتمم فرحتك بيهم
صباح الخير علي ولادك
صباح الياسمين والفل
تعيشي ويفنوا حسادك
ويسقوهم كاسات الذل
وبلغ يا سمير غطاس
يا ضيف المعتقل سنوي
بصوتك دا اللي كله نحاس
صباح الخير على الثانوي
وأهلا بيكو في القلعه
وباللي في الطريق جايين
ما دامت مصر ولاده
وفيها الطلق والعاده
حتفضل شمسها طالعه
برغم القلعه والزنازين
Aucun commentaire:
Enregistrer un commentaire