وشكون هي حركة20فبراير ؟

شكون هي حركة20فبراير ؟

-شباب دايرين النفس , و كيآمنو بالعز .. و لاد هاد لبلاد مكيقبلوش الظلم و الحكرة.

- و هي حركة ديموقراطية , يعني غادي يكونو الاحزاب و الجمعيات و و كل واحد غادي يقدر يقول لي بغا بلا.. ما يخاف..اول حاجة كتعطيها الحركة اهمية هي الشغل .. الخدمة خاصها تكون موجودة .. و الضمان الاجتماعي يكون لكلشي..من العساس ديال الباركينغ ..حتى لمساعدة منزلية.. و لي مخدامش يتخلص ماندا صغيرة من عند الدولة , حتى يلقا خدمة..من بعد الخدمة اهم حاجة هي الحرية ..يعني كل واحد كيفاش باغي يسيير حياتو, و المغاربة راه ماشي كلهم كيف كيف ..شي كيشرق و شي كيغرب و كيبقاو مغاربة و معندهوم لين على هاد لبلاد ..و كلا بغي حريتو .. و باغي راحتو.. وباغي يعيش حياتو كيف ما باغا هو....الا كانت عندنا الخدمة و الحرية الكرامة راها كاينة .. و المغربي يقدر يرفع راسو و يقول : انا مغربي.

- الشباب(و دابا مبقاوش غير الشباب كاين الكبار و الصغار حتى هوما)..معندوش مع التسمسير ديال السياسة و البيع و الشرا فيها ..و اغلبيتهم معمرو صوت و لا لاح شي ورقة على شي واحد و لا ترشح و لاباع صوتو بالفلوس..كانو مكيحملوش السياسة و السياسيين حيت عارفين القضية فيها الخنز و لوسخ...و هاذ الشباب مكيقبلوش شي واحد يصور لفلوس على حساب الفقر ديال وحدين خرين..فحال لي واقع فالكاريانات و الفيرمات ديال الكرفي و ش خلصة ما كاينة و البنات الفقيرات لي كيخدمو فديور الميسورين...كلشي هاد الشي مخصوش يكون اصلا و غدي نقضيو عليه.

ثانيا : آشنو باغيين؟

-البرلمان يتفركت .."النواب" و "المستشارين" طالعين غير بالفلوس..و حيت المخزن لي مطلعهوم .. و بزاف منهم مكيفكش الخط ..و ميعرف يسير حتى كوري معسا بلاد و اقتصاد ..المخزن مكيخافش من هادوك ديال البرلمان و ميكدوش يكولو شي حاجة متعجبوش... البرلمان عندنا غير مسرحية ..خاصو يمشي فحالو .. و غادي يمشي بزز منو ... و الحكومة فحال البرلمان و ما عندنا ما نديرو بيها و فيها غير صحاب الكاميلة و نسابهم و مادارو والو .. و كيبيعو المناصب..و كيخدمو غير صحابهم.

-بغينا الشعب ينتاخب واحد المجلس, يكونو بينوا أنهم كيفكرو فالشعب ماشي فروسهوم .. و يكونو قاريين و مجهدين .. و هوما يديرو دستور لي غادي يكولو لشعب قبلو و لا رفضو فاستفتاء ديال بصح .. و الدستور راه مهم .. حيت فيه كيبدا التقوليب و تحراميات.

- كاين واحد المجلس سميتو مجلس الحسابات .. و هاد المجلس عندو بزااف ديال الادلة على الاختلاسات و الشفرا ..يعني هادو شفارا المخزن بنفسو معتارف راه شفارا..بغيناهم يمشيو نلمحكمة مباشرة..نتا كتكول هوما شفارة .. علاش ما زال كيدورو برا؟؟؟... و ملي نساليو مع هادو عاد غادي نشوفو الشفارا لكبار لوخرين ....... (لكبار ماشي الصغار)..و خصهوم يردو الفلوس و بزز منهم غادي يردوها و غادي يدوزو نلمحكمة باش نتهناو من هاد القضية ديال لهريف عين باين و كلشي يجمع راسو.

- المطلب الرابع هو لي عذب شي واحد فالحبس .. راه المحكمة فينا هي حتا هو .. باش ميبقاش التعذيب تماما فالمغرب..ولا يتسامح مع هاداك لي تعدا عليه .. الا بغا يسمح ليه...هدا هو العدل لي ملي يتكاد كلشي غادي يتكاد.

-خامس حاجة ..هي كاينين ناس فالحبس مادايرين والو .. دخلوهم للحبس ظلم باش يخوفونا حنا.. باش مندويوش... يخرجو ملحبس و يعتاذرو ليهم و يعوضوهم.

- الاعلام يتحرر من الهيمنة المخزنية، ويولي عندك الحق تعبر على رأيك وتدوي على حقك فيه لانك انت لي تتخلصو بالضرائب ديالك..

ثالثا: و دابا نشوفو آشنو باغين فالاقتصاد.

1-خصنا اقتصاد كيفكر فالمواطن البسيط و كيعطيه فرصة ..فحال اوروبا ..ماشي اقتصاد كيفكر غير فالفاسي و بناني و صقلي و لماجيدي و ساجيد و الفاميلا ديالهم و صحابهم و لحاسين الكبا ديالهم.. راه كاين محمد و احمد و العياشي و فطيمة و خديجة و فوزية..و خوتهم و جيرانهم.

-لي خدام راه ماشي فالربح ..خاص تزاد ليه فالمانضة و لي مخدامش.. مانضا صغيرة من عند الاقتصاد لي كيفكر فيه .. حتى يلقا خدمة .. الا دولة لقات ليه خدمة و مابغاهاش.. تحييد ليه.

- الاثمان خاصها تهبط .. و راه ساهلة تهبط .. حيت هوما كيديرو الاحتكار فاي حاجة .. فالدوا و الدكيك و المطاحن و دانون و بيمو و التيليفون و الما المعدني..و كلشي .. ملي غادي يحيد الاحتكار و تكون منافسة ديال بصح.. غدي يهبطو الاسعار بوحدهوم..ملي غادي نحيدو المحتكرين غدي يوقع الرواج... و البيع و الشرا غادي يتحرك.

-الما و ضو نفس الشي ...راه معيقيين بالشفرة فيه.

- الناس لي عندهوم شواهد خاصهوم يخدمو .. مع الدولة و لا مع الشركات لي غدي تدور و تروج و تولي تخدم الناس بسهولة.

-خاصنا الضمان الاجتماعي لكاع بنادم لي خدام.

-سبيطار مزيان فابور .. و راه ممكن و ساهلة.

- بغينا مدرسة مزيانة باساتذة مزيانين ..فحال البريفي تقريبا و ليني فابور...ماشي المدارس ديال دابا لي كتكلخ الدراري ماشي كتقريهم و تأدبهم.

- فالمغرب دابا كاين ناس عندها الخبز والحرية و ليني ماشي كلشي عندو.. هاد جوج حاجات مهيمين ... بغيناهوم يكونو عند كولشي.

- بغينا الامازيغ يكون عندهم استاذ كيتكلم بالامازيغية و يعلم ولادهم العربية و الانجليزية و الحسلب بالامازيغية .. و ملي يمشي للمحكمة يلقا قاضي و محامي و كاتب كيهضرو بالامازيغية...

- التاريخ ديالنا خاصو يتعاود يتكتب حيت فيه بزاااااااف ديال لكدوب.

الحركة مفتوحة فوجه كاع لي كي آمن بالعز ... شرط واحد عندها ...ميكونش باغي يدير صرييف على ضهر الشعب.. و الفاهم يفهم.. لي هاداك هو غاراضو بلا م يجي .

و دابا ماشي تدير غير بارتاجي دير حتا امبريمي .. تيري و دير فوطوكوبي و فرق على عباد الله ...سرا و علانية.. ياك نتزعنا حرية التعبير نهار 13 مارس .. و نستعملوها؟ علاش لا؟