آش خاصك أ العريان؟ تي جي في أ مولاي

ستيلو:هندوسان/أكثر من 25 مليار هي ميزانية القطار الفائق 5السرعة لي عوالين شي وحدين الفوق و مكلفين و مسلفين باش يديروه في المغرب. هم مسلفين و مكلفين و لكن راه نحن لي غادي نخلصوه. و علاه باقي عندنا باش نخلصو شي حاجة؟ ماكرهناش حتى حنا نكونو بحال الدول المتقدمة و نبداو نسدو عينينا و نحلوهم و نلقاو راسنا في كازا أو طنجة و علاش كاع ما نديرو حتى القطار البراق نبداو نديرو الاسراء و المعراج في نص نهار!


و 25 مليار طرف كبير منها كريديات! غادي نوليو بحال هاداك لي تسلف باش يشري الطوموبيل و ماعندوش فلوس ليسانس و سنين و هو يخلص البانكة و حاط الطوموبيل و كيمشي على رجليه! دابا واش حنا محتاجين هاد تي جي في؟ وا نشوفو بعدا السكويلات و الصبيطارات... ياك كاين أطفال في البوادي لي كيضربو 4 ساعات باش يقراو ق ق ق قرد بقرة برتقال!؟ إيوا نديرو تي جي في و لا نبنيو لهم المدارس؟ ياك كاين العيالات في البوادي لي كيموتو فالطريق للصبيطار باش يولدو؟! إيوا نديرو تي جي في و لا نبنيو لهم الصبيطارات؟ ياك كاين الشومورا على الجهد فالبلاد، إيوا نفتحو لهم المعامل و لا نديرو تي جي في؟ درنا الشانطيات بعدا بقي لنا غير تي جي في؟
ملي كتجي تشوف كفاش حتى طاحت هاد الفكرة على هدوك لي الفوق كتلقى القضية فيها إن و أمها! الفكرة طاحت عليهم هم و نحن لي نتفلق! و كفاش طاحت هاد الفكرة عليهم؟ المغرب شرا ف16 من ماريكان و فرنسا طلع لها الدم (حيث كيسحاب لها المغرب خلاه لها باها )! ناض هداك لي الفوق قال لها سمحي لي أ الوليدة سمحي لي هاكي ها تي جي في ! القضية تفرشات في الويكيليكس الله يرحم له الوالدين.
و زايدون هاد الشركة لي شادا المشروع ضوصيها خانز! هاد الشركة الفرنسية لي سميتها ألستوم خدامة كتردم فالقدس و معمرا الشكارة مع الاستيطان. للا السعودية ملي "عاقت" بهاد الشركة سحبت منها مشروع الطرام لي كان غادي يربط مكة بالمدينة؟!!